قصيدة مهداة للحزب الكوردي الفيلي العراقي

الشاعر عواد العابدي
10/7/2005
 

وطن الجميع

الوطـنْ زفـّـة وفرحْ وأنـغامْ كرديـةْ       الوطنْ حـٍنـة وعـرسْ بـچفـوف فيلية

ْالوطنْ نجمة صبحْ وهلال ليلـةْ عيدْ       وهـديتـولـه بــحزبكمْ أحلى عيديـةْ

الوطن دبكةْ ونشيدْ وضحكةِِ الاطفالْ       الوطن بيـكم حلـه وكـبرتْ معانيـــه

الوطن منكم شربْ كاس المحبة ونامْ       وشموع الـفرحْ ترسـتْ صــوانيــه

الوطن شگگْ قميصه إلخيطه الـجلاد       ولبـسْ ثوب السعادة ونسه البعثية

الوطن ردّ إلهله وراحـتْ ليالي السود       إنتصرْ دمّ الشهيد و ماتـتْ الحــية

الوطن بيكم كـبرْ وارتفــعْ فــوگ الغيم       وشـمسکمْ طلعـتْ كلّ الحراميــة

تحياتي إلحزبـكمْ مـن گلــبْ مـلـيانْ       محبـة إلكلْ شريف اُويحسن إلـنية
 

.......................................................

خلْ نبـنـي الوطن خـل نزرع إلزيتـونْ       خـلْ يكبرْ زرعـنـة ونـگـعد إبـفيـّـه

خل نـزرعْ وردْ يـم إلشـهيد إلـطاحْ       ومنْ دمــّه إلشريفْ إنسوّي مـَلويـة

خل يمشي إلجبلْ ويضوگْ ماي الهـُورْ       وِيشـمّ الگـصـبْ و یبـو سْ برديـّه

وخل شـطّ إلرمـيثــةْ يعانـقِ إلشلال       ويـكتـبْ للوطـنْ تاريــخْ مـِِنْ مـَيـــّه

وخلْ نخلِ إلسماوة إيروحْ يمْ دوكانْ       وخل يلعبْ سـَعفـهه إهناكْ چـُوبيه

هذوله إحنه إلعراق إنطبعْ بينه وصارْ       كراسةْ رســـمْ بـــَلـوانْ ورد يــّـة

هذولـه احنه بنينـه إبكـلْ گلـبْ تمثالْ       ومنْ حــُبّ إلعراقْ وصغنـه ترچيـة

هذولـه احنه الحضارة إبعمرْ هاي الگاع       وِإليـعشگ وطنْ ما ينسه ماضيــّه

هذوله احنه كتبنـه على الگصـَبْ تاريخْ       ورفعنه إعلى الجبالْ إسمِ العراقية