يا ناس هلهولة
 

هج يا شعب من هذا الوطن هج
من هل الوطن يا شعب لديرة غرب هج
هج من القصف ،
هج من الفقر ،
هج من الظلم
وخلي النار بيهم توج وج
نسماتج يا هوا أبغداد صارت كلها تراب وعج
و دجلة الخير راح الخير منه
وصار ماي الحلو بيه مج
بقت الشهادة للاحباب عنوان
وصار الموت يلف ويلج وي اهلنه لج
* * * *
يا ابن الوطن لا تحجي
يا ابن الوطن حتى الصوت بيك مقموع
يا ابن الوطن لا تاكل تمر زهدي
يا ابن الوطن حتى النخل من الراس مقطوع
يا ابن الوطن لا تشعل شمع
يا ابن الوطن حتى النفط باللاله ممنوع
يا ابن الوطن لا تبجي
لا تذرف دمع
يا ابن الوطن جفن جوه العيون دموع
يا ابن الوطن لا تضحك
الضحك يا ابن الوطن عيب للمفجوع
يا ابن الوطن لا تفرح ابد
وخلي الحزن يجري بكاع اهلنه مثل ينبوع
يا ابن الوطن صار الشهيد للوطن
مثل لعبة الضايع والمضيوع
يا ابن الوطن هج
خل يحكم هالبلد صايع و ضايع و جربوع
وشلون ما يهج اللي صار بهذا الوطن مقموع
* * * *
بارضك يا وطن
حتى أجساد الناس بالزبالة محتركة
وأعراض البشر كل يوم متهتكة
والطفل بالحلة اهناك
وي ابن الكفاح
مصارينة بالسوق من بطنه متفتكة
* * * *
الحكم بالعراق يرقص على انغام ماصولة
والبعث يردون يرجعوه للحكم
يايمة صفقولة
والوطن يمشي صفح
والأيد مشلولة
والبعث يردون يرجعوه للحكم
يا ناس هلهولة

ضياء السورملي ـ لندن
17/7/2007